पोर्चुगल पठाइदिने भनी ६८ लाख बढि ठगी गर्ने पक्राउ

 काठमाडौं महानगरपालिका १० स्थित रहेको Happy Educational Consultancy का सञ्चालक जिल्ला चितवन, राप्ती नगरपालिका २ घर भएको वर्ष ३२ को बद्री सिलवालले अध्ययन भिसामा विदेश पठाउने भनि सोही कन्सल्टेन्सीको खातामा २ जना विद्यार्थीहरूलाई जम्मा रु.२१,७०,०००।- रकम जम्मा गर्न लगाई निजहरूलाई पोर्चुगल पठाउने प्रक्रिया गर्दै गरेको भनि झुलाई उक्त कन्सल्टेन्सी बन्द गरी फरार भई ठगी गरेको भनी प्राप्त जाहेरीको आधारमा प्रहरी वृत लैनचौरबाट खटिएको प्रहरी टोलीले मिति २०८२।१०।२० गते निजलाई पक्राउ गरी थप लिइ अनुसन्धान भइरहेको जिल्ला प्रहरी कार्यालय काठमाण्डौको बिज्ञप्तिमा उल्लेख गरिएको छ ।

साथै, हालसम्म निजले आफ्नो परिचय केदार प्रसाद सिलवाल हो भनि अर्का एक विद्यार्थीलाई अध्ययन भिसामा स्पेन पठाउने भनि केदार प्रसाद सिलवालको नाममा रु.१२,००,०००।- को चेक काट्न लगाई भुक्तानी लिएको र केदार प्रसाद सिलवालकै नामको बैंक खातामा रु.४०,०००।- रकम समेत जम्मा गर्न लगाई जम्मा रु.१२,४०,०००।- रकम ठगी गरेको जाहेरी दरखास्त प्राप्त भएको तथा निज बद्री सिलवालले जिल्ला चितवन, भरतपुर उपमहानगरपालिका १० मा Happy Educational Consultancy सञ्चालन गरी ४ जनालाई सर्बिया देशमा कामदार भिसामा पठाउने भनि जम्मा रु.२१,९०,५००।- रकम लिई सम्पर्क विहीन भएको भनी उजुरी प्राप्त भएको र निजले स्पेन पठाउँछु भनि अन्य तिन जना मानिसहरूबाट समेत रु.१२,००,०००।- रकम लिई ठगी गरेको भनि पीडित सम्पर्कमा आएको जिल्ला प्रहरी कार्यालय काठमाण्डौको बिज्ञप्तिमा उल्लेख गरिएको छ ।