आहा! रारा पोखरा गोल्डकपमा जावलाखेल युथ क्लब सेमिफाइनलमा

जावलाखेल युथ क्लबले २५औँ आहा! रारा पोखरा गोल्डकपअन्तर्गत दोस्रो क्वार्टरफाइनल खेलमा चर्च ब्वाइज युनाइटेडलाई ३–० ले पराजित गर्दै सेमिफाइनलमा स्थान सुरक्षित गरेको छ ।यो जित सँगै आहा! रारा पोखरा गोल्डकपमा आइतबार सम्पन्न खेलमा जावलाखेल प्रतियोगिताको सेमिफाइनल पुग्ने दोस्रो टोली बनेको हो ।जावलाखेलले पहिलो गोल धर्मेन्द्र कुँवरमार्फत गरेको थियो । चर्च ब्वाइजका गोलरक्षक दीप कार्कीले डाइभ गर्दै बल समात्ने क्रममा हातबाट फुत्काएपछि धर्मेन्द्रले कुनै गल्ती नगरी अवसरको सदुपयोग गर्दै टोलीलाई अग्रता दिलाए ।दोस्रो गोल जमैकन खेलाडी निकोलस ह्यामिल्टनले गरे । उनले उत्कृष्ट व्यक्तिगत प्रदर्शन गर्दै गोलरक्षक दीप कार्कीलाई बीट गर्दै सुन्दर गोल गर्दै टोलीको अग्रता दोब्बर बनाए ।दोस्रो गोल भएको दुई मिनेटमै, खेलको ९०औँ मिनेटमा सुजन गुरुङले तेस्रो गोल थपे । जितसँगै जावलाखेल युथ क्लब उच्च मनोबलका साथ सेमिफाइनलमा प्रवेश गरेको छ ।सोमबारको तेस्रो क्वार्टरफायनल खेल मनाङ मर्स्याङदी क्लब र भारत सिक्किमको थन्डरबोल्ट नर्थ युनाइटेडका बीच हुनेछ ।